Analistë dhe ekspertë amerikanë vlerësojnë se pavarësisht që rezoluta e paraqitur nga Serbia, e cila pritet të shqyrtohet në Asamblenë e Përgjithshme të OKB-së,  nuk mund të ndryshojë asgjë për Kosovën, ajo në radhë të parë synon bllokimin e mëtejmë të njohjeve, që mund të bëhen  pasi që  Gjykata Ndërkombëtare a Drejtësisë shpalli të ligjshme pavarësinë së Kosovës. Rezoluta e Serbisë ka bërë që diplomacia e Kosovës dhe aleatët të angazhohen për mos votimin e Rezolutës së Serbisë.

Ministri i Jashtëm serb, Jeremiq ka deklaruar se Serbia nuk planifikon ta tërheq rezolutën që e ka paraqitur para Asamblesë së Përgjithshme të OKB-së, për shkak se rezoluta, sipas tij, është mjet për arritjen e qëllimeve të Serbisë. Megjithatë, janë duke u bërë diskutime intensive dhe bisedime me të gjithë aktorët ndërkombëtarë, përfshirë edhe ata nga BE-ja. Nëse arrihet marrëveshja, atëherë ajo do të jetë pa tërheqjen e rezolutës, ka sqaruar Jeremiq. Ndërkohë bëhet e ditur se kryetari i Serbisë, Tadiq do të qëndrojë në Bruksel, me ç rast do të takohet me shefen e diplomacisë së BE, Ketrin Ashton, e cila do të bëjë përpjekje për ta bindur Serbinë, në mënyrë  që Beogradi zyrtar  të tërheqë rezolutën për Kosovën. 

Gjyqtari amerikan, Robert Korolajn ka shqyrtuar lëndën e kryetarit  Fatmir Sejdiu, lidhur me shkeljen e Kushtetutës.  Konstatimet e tij,  ai i ka dërguar në Kolegjin Shqyrtues të Gjykatës Kushtetuese të Kosovës, meqë konsideron  se  kryetari, Fatmir Sejdiu ka rënë ndesh me Kushtetutën, duke mbajtur postin e Kryetarit të LDK - së. Konstatimet e këtij gjyqtari ndodhen në Kolegjin Shqyrtues të Gjykatës Kushtetuese, ndërsa në fund të shtatorit jepet verdikti. Ky është një hap para  në këtë proces gjyqësor, të iniciuar nga më shumë se tridhjetë deputetë, të cilët kërkojnë nga Gjykata Kushtetuese të deklarohet nëse Fatmir Sejdiu po e shkel Kushtetutën, duke mos dhënë dorëheqje nga posti i Kryetarit të LDK-së. Bëhet e ditur se brenda disa ditësh Kolegji Shqyrtues duhet të marrë vendim për t’i dërguar apo jo konstatimet e Gjyqtarit Amerikan te Paneli i Gjykatës.

Ambasadori i Anglisë në Prishtinë, Andy Sparkes, i cili është emëruar  zëvendës-shef i  EULEX-it, është cituar të ketë deklaruar se ekzistojnë kufij të caktuar deri ku mund të bisedohet për kompromis, sepse qëndrimi ynë i fuqishëm është që Kosova është e pavarur dhe sovrane. Mirëpo, bisedat teknike Kosovë-Serbi janë të mundshme dhe të dëshirueshme, ka saktësuar Sparks, duke shtuar se  nga Serbia askush nuk po kërkon që qysh  tani ta njoh Kosovën, por duket pasur para sysh faktin se më shumë se 80 për qind e  vendeve anëtare të BE-së e kanë njohur pavarësinë e Kosovës.

Ministri i Punëve të Jashtme i Austrisë, Mihajl Spindeleger, ka porositur të arrihet një kompromis ndërmjet Beogradit zyrtar dhe Bashkimit Evropian lidhur me rezolutën e Serbisë për Kosovën, të cilën Beogradi zyrtar e ka paraqitur  në Asamblenë e Përgjithshme të OKB-së. Ne e kuptojmë se Serbia nuk do të njohë Kosovën qysh nesër, por nuk mund të pranojmë që pavarësia e Kosovës edhe një herë të vihet në pikëpyetje, ka saktësuar Spindeleger. Nëse eventualisht Beogradi do të kishte sukses që të ketë rezolutë kundër qëndrimit të BE-së, kjo do të ishte e dëmshme për rrugën e Serbisë në Evropë”, ka sqaruar ministri austriak.

Institucionet e Kosovës së bashku me partneret ndërkombëtarë janë angazhuar që të mos kenë sukses përpjekjet e Serbisë për miratimin e projekt-rezolutës së saj gjatë Asamblesë së Përgjithshme të Kombeve të Bashkuara, ka deklaruar kryetari, Fatmir Sejdiu, gjatë nisjes për në Nju Jork. Qëllimi ynë themelor është që në Nju Jork të takojmë përfaqësues të delegacioneve dhe udhëheqës të shteteve anëtare të Kombeve të Bashkuara që do të jenë në kohën e Asamblesë së Përgjithshme atje. Është kohë e debatit të mundshëm për projektrezolutën e paraqitur nga Serbia, që po bëhet me qëllim për të penguar ecjen tonë të mëtejshme dhe të relativizojë qëndrimin e qartë të shprehur nga Gjykata Ndërkombëtare e Drejtësisë.

Kryetari, Fatmir Sejdiu ka deklaruar se njohja e Kosovës është ndihmesë edhe për vendet e tjera të rajonit dhe më gjerë. Duke e falënderuar Hondurasin për vendimin e tij për njohjen e vendit tone, kryetari Sejdiu ka ftuar edhe shtetet e tjera që ta njohin Kosovën në mënyrë që t’i hapet rruga kësaj pjesë të Evropës drejt Bashkimit Evropian. Këto deklarata, kryetari Sejdiu i bëri në ceremoninë e organizuar në Prishtinë për nderë të 100 vjetorit të lindjes së Nënë Terezës, ku morën pjesë edhe zyrtarë ndërkombëtarë dhe i dërguari i posaçëm i Vatikanit, imzot Zef Gashi.